پاک سوزوکی نے بنگلہ دیش، افغانستان کو گاڑیاں برآمد کرنا شروع کر دیں

پاک سوزوکی موٹر کمپنی لمیٹڈ نے بنگلہ دیش اور افغانستان کو گاڑیاں برآمد کرنا شروع کر دیں ،اس بات کا انکشاف پاکستان میں آٹو مینوفیکچرنگ کے سفر میں اہم سنگ میل کرنیکے حوالے سے منعقدہ افتتاحی تقریب کے دوران کیا گیا۔
اپنے خیر مقدمی خطاب میں پاک سوزوکی کے ہیڈ آف کارپوریٹ افیئرز شفیق احمد شیخ نے شکریہ ادا کیا اور وفاقی وزیر صنعت و پیداوار رانا تنویر حسین، ، ای ڈی بی کے سی ای او خدا بخش،وفاقی سیکریٹری صنعت و پیداوار سیف انجم اور منیجنگ ڈائریکٹر اور پاک سوزوکی کے سی ای او ہیروشی کاوامورا سمیت دیگر مہمانوں کو خوش آمدید کہا۔یاد رہے کہ گزشتہ روز ہی انڈس موٹر کمپنی نے اہم سنگ میل عبور کرتے ہوئے پاکستان میں گاڑیاں بنا کر انکی برآمدات کا آغاز کردیا تھا،کمپنی کی جانب سے یہ اعلان اپنے پورٹ قاسم اتھارٹی میں موجود مینوفیچرنگ پلانٹ میں منعقدہ ایک تقریب کے دوران کیا گیا تھا۔
اس موقع پر وفاقی وزیر رانا تنویر حسین نے اپنے ایک بیان میں زور دے کر کہا کہ پاکستان کی معروف کمپنیوں میں سے ایک انڈس موٹر کو برآمدات میں حصہ ڈالتے ہوئے دیکھنا باعث فخر ہے۔حکومت کی آٹو موٹیو انڈسٹری ڈویلپمنٹ اینڈ ایکسپورٹ پالیسی 2021-26ء پالیسی کا مقصد مقامی پرزوں اور گاڑیوں کی برآمد کی حوصلہ افزائی کرکے آٹو موٹیو سیکٹر کو فروغ دینا ہے۔