ضلع گوادر میں چار ڈیم تیار ہیں‘ ایکسیئن پبلک ہیلتھ ضلع گوادر شکیل احمد

گوادر (خ ن ) ایکسیئن پبلک ہیلتھ ضلع گوادر شکیل احمد نے کہا ہے کہ 97کروڑ روپے کی لاگت سے آنکاڑہ ڈیم سے جیونی سٹی کو پانی سپلائی کرنے کے منصوبے کا آغاز کررہے ہیں،شادی کور ڈیم سے پائپ لائن کے زریعے پانی سپلائی کرنے کے لیے پی سی ون بنا لیا ہے،ضلع گوادر کے تمام ڈیم پانی سے لبریز ہیں ۔ایک انٹرویو میں شکیل احمد بلوچ نے کہا ہے کہ جیونی شہر کو آنکاڑہ ڈیم سے پانی کی سپلائی کرنے کے منصوبے کا آغاز کررہے ہیں۔انہوں نے کہا کہ ضلع گوادر میں چار ڈیم تیار ہیں اور ان میں پانی بھی وافر مقدار میں موجود ہے لیکن بعض جگہوں پر پرانے سسٹم اور پائپ لائن کی وجہ سے مشکلات آجاتی ہیں اور اِن سسٹم کو اپ گریڈ کرنے کی ضرورت ہے۔انہوں نے

کہا کہ گوادر سٹی میں جی ڈی اے ڈسٹری بیوشن لائن بچھا رہی ہے اس کی تکمیل کے بعد شہر میں پانی کی سپلائی مزید بہتر ہوگی۔انہوں نے کہا گوادر سٹی کی پائپ لائن 1993 میں بچھائی گئی تھی اور اس وقت گوادر کی آبادی اتنی نہیں تھی اور پرانے پائپ لائنوں میں لیکیج بھی موجود ہیں۔چونکہ گوادر اب ایک بڑا شہر بننے جارہا ہے اور یہاں آبادی میں روز بروز اضافہ ہورہا ہے اسی لیے محکمہ پی ایچ ای اب یہاں ہنگامی بنیادوں پر کام کررہا ہے تاکہ پانی کی ترسیل کو مذید بہتر بنایا جاسکے۔انہوں نے کہا کہ ضلع گوادر میں زیر زمین پانی بالکل بھی موجود نہیں ہے پانی کی سپلائی کا انحصار زیادہ تر ڈیم اور ڈی سیلیشن پلانٹ کے زریعے ہوتی ہے اور یہاں پر ڈی سیلیشن پلانٹ نہ چلنے کے برابر ہیں۔انہوں نے کہا کہ جیونی شہر کے لیے پہلی مرتبہ پائپ لائن 1993 میں بچھائی گئی تھی اور اس کی سائز بھی چھوٹا ہے اور اسی پائپ لائن سے آس پاس کے علاقوں کو بھی پانی کی سپلائی کی جاتی ہے

اسی لیے جیونی شہر میں پانی بروقت نہیں پہنچ پاتا لیکن جیونی شہر میں پانی کے مستقل حل کے لیے آئندہ دو روز میں ایک بڑے منصوبے کا آغاز کررہے ہیں جس میں 97 کروڑ روپے کی لاگت سے آنکاڑہ ڈیم سے جیونی کو پانی کی سپلائی کرنے کے لیے علیحدہ پائپ لائن بچھانے کے منصوبے کا افتتاح کیا جارہا ہے۔انہوں نے کہا کہ منصوبے سے جیونی میں پانی کا مسلہ مستقل طور پر حل ہوجائے گا اگر صوبائی حکومت نے اس منصوبے کے فنڈز وقتی طور پر ریلیز کردیے تو چھ مہینے کے اندر اندر اس منصوبے کو پائیہ تکمیل تک پہنچایا جائے گا۔انہوں نے کہا کہ شادی کور ڈیم سے پسنی شہر کو پائپ لائن کے زریعے پانی کی سپلائی کرنے کے منصوبے کا پی سی ون بناکر پی ایچ ای ڈیپارٹمنٹ اور پی اینڈ ڈی کو ارسال کردیا گیا ہے منظور ہونے کے بعد اس پر بھی کام شروع کردیا جائے گا۔انہوں نے کہا کہ ایک تحریک کی جانب سے مجھے خوامخواہ سیاسی بنانے کی کوشش کی جارہی ہے حالانکہ میں پولیٹیکل نہیں ہوں میں ایک سرکاری ملازم ہوں اگر کسی نے میرے تبادلے کا ڈیمانڈ اپنے چارٹر آف ڈیمانڈ میں شامل کر دیا ہے تو میں کسی کو منع نہیں کرسکتا۔انہوں نے کہا کہ لوگ کام دیکھتے ہیں اور میں اپنا کام ہر حال میں جاری رکھونگا اور عوام کو بروقت پانی فراہم کرنے کے لیے دن رات کام کرتا رہونگا