اپوزیشن کی ریکوزیشن پر طلب کیا گیاسینیٹ کا ہنگامی اجلاس (کل) ہوگا

اسلام آباد: اپوزیشن کی ریکوزیشن پر طلب کیا گیاسینیٹ کا ہنگامی اجلاس (کل)منگل کو چیئرمین صادق سنجرانی کی زیر صدارت ہوگا۔اپوزیشن جماعتوں کی جانب سے ملکی سیاسی صورتحال ،مہنگائی اور حکومت کی جانب سے آرڈیننس کے ذریعے قانون سازی پر شدید احتجاج کا امکان ہے۔ سینیٹ اجلاس سے قبل حکومتی اتحادی اور اپوزیشن اتحادی جماعتوں کے الگ الگ اجلاس ہونگے۔تفصیلات کے مطابق اپوزیشن کی ریکوزیشن پر چیئرمین سینیٹ صادق سنجرانی کی جانب سے طلب کیا گیا سینیٹ اجلاس (کل)منگل کو سہ پہر4بجے پارلیمنٹ ہائوس میں ہو گا

۔ذرائع کے مطابق اپوزیشن جماعتوں کی جانب سے ملکی سیاسی صورتحال ،سیاسی جماعتوں کے قائدین کی گرفتاریوں اور انکی بگڑتی صحت اور مبینہ طور پر انکو علاج کی مناسب سہولیات کی عدم فراہمی ،ملک میں مہنگائی اور آرڈیننس کے ذریعے قانون سازی پر شدید احتجاج کا امکان ہے۔دوسری جانب سینیٹ اجلاس سے قبل حکومتی واتحادی پارلیمانی جماعتوں کا اجلاس بھی طلب کرلیا گیا ہے۔حکومتی اتحادی جماعتوں کا اجلاس (کل)منگل کوسہ پہر سوا تین بجے پارلیمنٹ ہائوس کمیٹی روم نمبر 4میں ہوگا،اجلاس کی صدارت قائد ایوان سینیٹر سید شبلی فراز کرینگے۔اجلاس میں سینیٹ سیشن سے متعلق حکمت عملی طے کی جائے گیجبکہ سینیٹ میں تمام اپوزیشن جماعتوں کی پارلیمانی پارٹی کا اجلاس بھی (کل)منگل کو3بجے ہوگا۔اجلاس قائد حزب اختلاف راجہ ظفر الحق کی زیر صدارت پارلیمنٹ ہائوس کے کمیٹی روم نمبر1میں منعقد ہوگا۔اجلاس میں سینیٹ سیشن سے متعلق مشترکہ حکمت عملی طے کی جائے ۔