ایران میں پرتشدد مظاہروں کے دوران 208 افراد جاں بحق ہوئے،ایمنسٹی

  ایران میں پرتشدد مظاہروں کے دوران 208 افراد جاں بحق ہوئے،ایمنسٹی
ہمارے مندوبین ایران میں ہلاکتوں کی اصل تعداد کا کھوج لگانے کے لیے معتبر معلومات جمع کررہے ہیں،بیان
لندن انسانی حقوق کی عالمی تنظیم ایمنسٹی انٹرنیشنل نے کہاہے کہ حالیہ ایام میں ایران میں ہونیوالے احتجاجی مظاہروں کے دوران پولیس اور سیکیورٹی فورسز کے حملوں میں کم سے کم 208 افراد ہلاک ہوئے،میڈیارپورٹس کے مطابق لندن میں قائم ایمنسٹی انٹرنیشنل کے دفتر سے جاری بیان میں کہا گیا کہ وسط نومبر کے دوران ایران میں ہونے والے پرتشدد مظاہروں میں ہلاکتوں کی تعداد 208 تک پہنچ گئی ہے۔ انسانی حقوق گروپ کا کہناتھا کہ اس کے مندوبین ایران میں ہلاکتوں کی اصل تعداد کا کھوج لگانے کے لیے معتبر معلومات جمع کررہے ہیں۔ایمنسٹی نے گذشتہ جمعہ کو ٹویٹر پر کہا تھا کہ ایران میں مظاہروں میں ہلاکتوں کی تعداد 161 تک پہنچ گئی ہے۔ اس سے پہلے ہونے والے تخمینے کے مطابق ہلاکتوں کی تعداد 143 بتائی گئی تھی۔ایران میں ایندھن کی قیمتوں میں اضافے کے خلاف ملک بھر میں اچانک لوگ احتجاج کرتے ہوئے سڑکوں پر نکل آئے تھے۔پانچ دن تک جاری رہنے والے غیرمسبوق احتجاج کے دوران ایرانی سیکیورٹی فورسز کی طرف سے مظاہرین کے خلاف طاقت کا وحشیانہ استعمال کیا گیا۔ انسانی حقوق کے گروپوں کا کہنا تھا کہ ایران میں مظاہرین کو گھروں کی چھتوں سے باقاعدہ نشانہ بنا کر گولیاں ماری گئیں۔ ہیلی کاپٹروں سے نشانہ بنایا گیا اور سڑکوں پر ان کا تعاقب کرتے ہوئے انہیں ہلاک کیا گیا۔