بلاول بھٹو زرداری کا سلمان تاثیر کو ان کی نویں برسی پر خراج عقیدت پیش

اسلام آباد (این این آئی)پی پی پی چیئرمین بلاول بھٹو زرداری نے سلمان تاثیر کو ان کی نویں برسی پر خراج عقیدت پیش کرتے ہوئے کہا ہے کہ وہ انتہا پسندی کے خطرات کے آگے اور کمزور طبقات کے حقوق و تحفظ کیلئے آہنی دیوار بن کر کھڑے رہے،پیپلز پارٹی ملک میں رنگ، نسل یا عقیدے کی بنیاد پر کسی قانون کو غلط استعمال کرنے کی اجازت نہیں دے گی،ہم بڑی قربانیوں کے بعد ملنے والے حقوق پر کسی مصلحت کا شکار نہیں ہوں گے۔ ہفتہ کوسلمان تاثیر کی برسی پر اپنے پیغام میں انہوںنے کہاکہ وہ انتھاپسندی کے خطرات کے آگے اور کمزور طبقات کے حقوق و تحفظ کیلئے آہنی دیوار بن کر کھڑے رہے۔بلاول بھٹو زرداری نے کہاکہ شہید سلمان تاثیر کی شہادت ان کے خاندان اور پارٹی کے ساتھ ساتھ قوم کا بھی بہت بڑا نقصان تھا۔ انہوںنے کہاکہ ترقی پسند و جمہوریت پسند رہنما و کارکنان بنیادی طور قوم کا اثاثہ ہوتے ہیں۔انہوںنے کہاکہ پیپلزپارٹی نے انتھاپسندی و دہشتگردی کے خلاف جنگ میں سیاسی و نظریاتی محاذ پر قیادت کی۔انہوںنے کہاکہ پاکستان میں انتھاپسندی و مذھبی جنونیت کو ہمیشہ عوام کے حقوق غضب کرنے کے لیئے بطور آلہ استعمال کیا گیا۔انہوںنے کہاکہ پیپلز پارٹی ملک میں رنگ، نسل یا عقیدے کی بنیاد پر کسی قانون کو غلط استعمال کرنے کی اجازت نہیں دے گی۔ انہوںنے کہاکہ شہید بھٹو کی شروع کردہ وہ جدوجہد جاری رکھیں گے، جو قائداعظم کے 11 اگست 1947ع کے خطاب کی آئینہ دار ہے۔ انہوںنے کہاکہ یہ جدوجہد پاکستان کو مساوات، جمہوریت اور رواداری کا گہوارہ بنانے کی جدوجہد ہے۔ انہوںنے کہاکہ اسی جدوجہد کے دوران ہم نے شہید محترمہ بینظیر بھٹو اور شہید سلمان تاثیر سمیت بیشمار ہیروز کی قربانیاں دیں۔ انہوںنے کہاکہ ہم بڑی قربانیوں کے بعد ملنے والے حقوق پر کسی مصلحت کا شکار نہیں ہوں گے۔