شیخ رشید کی سری نگر کے حالات مزید خراب ہونے کی پیشگوئی

راولپنڈی: وزیر ریلوے شیخ رشید احمد نے آئندہ 15 روز کے دوران سری نگر کے حالات مزید خراب ہونے کی پیشگوئی کر تے ہوئے کہا ہے کہ نریندر مودی بنیادی طور پر ایک دہشتگرد ہے، سری نگر میں اسرائیلی طرز کا اسٹرکچر لانا چاہتا ہے،مودی کی خواہش ہے کہ سری نگر براہ راست نئی دہلی سے کنٹرول کیا جائے،ہمیں پوری طاقت، جوش ، ولولے سے پاک فوج کے ساتھ کھڑے ہونا ہے۔مقبوضہ کشمیر میں بھارتی افواج کی تازہ ترین کاروائیوں پر اپنے خصوصی بیان میں وزیر ریلوے شیخ رشید احمد نے کہا بھارتی وزیراعظم نریندر مودی بنیادی طور پر ایک دہشتگرد ہے، انہوں نے ایک مسلمان کو بھی نشست نہیں دی اور کسی مسلمان سے ووٹ تک نہیں مانگا۔وزیر ریلوے کا کہنا تھا کہ مودی سری نگر میں اسرائیلی طرز کا اسٹرکچر لانا چاہتا ہے، بھارت 40 ہزار پیراٹروپس کشمیر میں لے آیا ہے۔ان کا کہنا تھا کہ نریندر مودی کی خواہش ہے کہ سری نگر براہ راست نئی دہلی سے کنٹرول کیا جائے تاہم ایسا کشمیریوں کو کسی صورت قبول نہیں ہوگا۔شیخ رشید کا کہنا تھا کہ نریندر مودی کو سب سے بڑی تکلیف وزیراعظم عمران خان اور امریکی صدر ڈونلڈ ٹرمپ کے درمیان کامیاب مذاکرات سے ہوئی۔انہوں نے کہا کہ بھارت کی امریکہ میں زبان کچھ اور ہے اور بھارت میں کچھ اور تاہم صدر ٹرمپ نے بھارت کو بے نقاب کیا ہے۔ان کا کہنا تھا کہ ہمیں پوری طاقت، جوش ، ولولے سے پاک فوج کے ساتھ کھڑے ہونا ہے۔شیخ رشید احمد کا کہنا تھا کہ نوجوان کشمیریوں پر ہونے والے مظالم کے خلاف ہر سطح پر آواز اٹھائیں۔