سعودی عرب کا تاریخی اعلان ،ہر ویزا ہولڈر کو عمرہ کی اجازت

ویب ڈیسک: سعودی وزارتِ حج و عمرہ نے ایک انقلابی قدم اٹھاتے ہوئے اعلان کیا ہے کہ اب سعودی عرب میں موجود تمام اقسام کے ویزا ہولڈرز عمرہ ادا کر سکیں گے۔ اس فیصلے سے دنیا بھر کے مسلمانوں کے لیے عمرہ کے دروازے مکمل طور پر کھول دیے گئے ہیں۔

وزارت کے مطابق یہ سہولت ذاتی، خاندانی، ای-ٹورسٹ، ٹرانزٹ، ورک اور تمام دیگر اقسام کے ویزا رکھنے والوں کے لیے دستیاب ہے۔ اس اقدام کا مقصد عمرہ زائرین کے لیے عبادت کو مزید آسان، محفوظ اور سہل بنانا ہے۔

وزارت نے اپنے بیان میں کہا کہ یہ فیصلہ خادم الحرمین الشریفین شاہ سلمان بن عبدالعزیز اور ولی عہد و وزیراعظم شہزادہ محمد بن سلمان کے وژن 2030 کے اہداف کے مطابق ہے، جس کے تحت زائرین کو جدید سہولیات اور روحانی سکون فراہم کرنا ترجیح ہے۔

مزید بتایا گیا کہ وزارت نے حال ہی میں “نسک عمرہ پلیٹ فارم” متعارف کرایا ہے، جہاں سے زائرین آن لائن پیکجز کا انتخاب کر کے الیکٹرانک عمرہ پرمٹ حاصل کر سکتے ہیں۔ یہ نظام عمرہ کے خواہشمندوں کو تاریخ، وقت، اور خدمات کے انتخاب میں مکمل سہولت اور آزادی فراہم کرتا ہے۔

بیان میں مزید کہا گیا کہ یہ اقدام حج و عمرہ خدمات کے دائرہ کار کو وسعت دینے کے ساتھ ساتھ زائرین کو سہولت، سلامتی اور روحانی اطمینان فراہم کرنے کے عزم کی عکاسی کرتا ہے۔