جس حالت میں ملک ملا اس سے بہتر حالت میں منتخب حکومت کے حوالے کرینگے ،مرتضیٰ سولنگی
نگران وفاقی وزیر اطلاعات و نشریات مرتضیٰ سولنگی نے ایک بار پھر واضح کیاہے کہ انتخابات کے انعقاد کے حوالے سے کسی قسم کا کوئی شک و شبہ نہیں ہونا چاہیے کیونکہ8 فروری 2024ءکو پورے ملک میں انتخابات ہوں گے،موجودہ نگران وفاقی حکومت ملک بھر میں آزادانہ، غیر جانبدارانہ اور شفاف انتخابات کرانے کیلئے پرعزم ہے،آج پاکستان اسٹاک ایکسچینج 100 انڈیکس 66 ہزار کی حد عبور کر چکا ہے۔ ڈالر کی قدر میں بھی کمی ہوئی ہے، کچھ لوگ افواہیں پھیلا رہے تھے کہ آئی ایم ایف کے اگلے بورڈ میں پاکستان کا کیس نہیں ہے۔ ان خیالات کا اظہار انہوںنے گزشتہ روز کوئٹہ پریس کلب میں نگران وزیراطلاعات جان اچکزئی ،اور کوئٹہ پریس کلب کے صدر عبدالخالق رند کے ہمراہ پریس کانفرنس سے خطاب کرتے ہوئے کیا ۔ مرتضیٰ سولنگی نے کہاکہ وفاقی حکومت چاروں صوبائی حکومتوں کے ساتھ مل کر اس فریضے کو سرانجام دے گی، ہمارے آئین کی تمہید میں لکھا ہے کہ یہ ملک اس کے منتخب نمائندے چلائیں گے،جس حالت میں ملک ملا ہے، اس سے بہتر حالت میں اگلی منتخب حکومت کے حوالے کریں گے، آج پاکستان اسٹاک ایکسچینج 100 انڈیکس 66 ہزار کی حد عبور کر چکا ہے۔ انہوں نے کہاکہ ڈالر کی قدر میں بھی کمی ہوئی ہے، کچھ لوگ افواہیں پھیلا رہے تھے کہ آئی ایم ایف کے اگلے بورڈ میں پاکستان کا کیس نہیں ہے، بلومبرگ کی آج کی خبر ہے کہ 11 جنوری کو پاکستان آئی ایم ایف بورڈ کے ایجنڈے پر ہے، ہمیں خوشی ہے کہ ملک معاشی استحکام کی طرف بڑھ رہا ہے۔ انہوں نے کہاکہ پی ٹی وی کوئٹہ سینٹر کے دورہ کے دوران پی ٹی وی بولان کی ٹیرسٹیریل براڈ کاسٹنگ کے حوالے سے گفتگو ہوئی، ملک کے جغرافیائی رقبہ کا 43 فیصد رقبہ بلوچستان میں ہے، پی ٹی وی بولان کی نشریات کو انٹینا کے ذریعے ممکن بنانے پر کوشش کریں گے۔ انہوںنے کہاکہ بلوچستان تاریخی اعتبار سے ایک متنوع صوبہ ہے،پی ٹی وی بولان کی نشریات کا دائرہ کار بڑھایا جا رہا ہے، 17 دسمبر سے انشاءاللہ پی ٹی وی بولان پر ہزاروی زبان میں بھی نشریات شروع کریں گے، ہماری کوشش ہوگی کہ پی ٹی وی بولان کی تکنیکی اور ہیومن ریسورس ضروریات کو پورا کریں۔ انہوں نے کہاکہ نگران حکومت کے اختیارات اور مدت محدود ہے، کوئٹہ پریس کلب اور بلوچستان کے صحافیوں کی فلاح و بہبود کیلئے جو بھی ممکن ہوگا، اقدامات اٹھائیں گے۔