کوئٹہ کی ادبی سرگرمیاں بحال ہو گئیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ادبی رپورٹ* شیخ فرید
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وادیء شال میں سرخ گلابوں کی بہار نے سماں باندھ دیا ہے ۔ اور ہنہ جھیل کے نیلگوں پانیوں پر مرغابیوں کے غول آنا شروع ہو چکے ہیں ۔
وادیء کوئٹہ کے
مشکبار ہواؤں کے جھونکوں نے چلتن و زرغون کے کانوں میں سرگوشیاں بہار آنے کو ہے ۔ مہردر و تکتو نے باد صبا کو بوسے دیئےہیں ۔
لگتاہے کوئٹہ میں شعرو سخن کی محفلیں سجنے اور علم و ادب کی مجالس برپاء ہونے لگئی ہیں ۔ تبہی تو کوئٹہ کی ادبی تنظیموں نے ایک ساتھ کئی کئی تقاریب منعقد کرکےادبی جمود کو پارہ پارہ کر دیا . ڈاکٹر ایم صلاح الدین مینگل کی یاد میں
متواتر چھ ادبی ریفرنسز کے بعد گزشتہ دنوں”کاروانِ ادب شال” کی ادبی نشست کا انعقاد کیا گیا ۔
تقریب کی صدارت معروف ادیب و دانشور پروفیسر نصیب ساگر نے کی ، جبکہ ممتاز اہلِ قلم میں پروفیسر احمد شیر راحل، پروفیسر شبیر فرہاد، نصیر احمد گل جی اور مہمانِ خصوصی جناب کبیر احمد عاطف (نائب صدر، شانِ ادبی کاروان) شامل تھے۔ تقریب دو سیشنز پر مشتمل تھی
پہلے سیشن میں علمی و فکری گفتگو کی گئی جس میں ادب ، معاشرہ اور زبان کی عصری صورتحال پر سیر حاصل تبادلۂ خیال ہوا ۔ دوسرےسیشن میں مشاعرے کا اہتمام کیا گیا تھا ، جس میں اردو اور براہوئی کے ممتاز شعراء نے اپنا منتخب کلام سنایا ۔
نمونۂ کلام جو ضبط تحریر آ سکا نذر قارئین ہے ،
پروفیسر شبیر فرہاد نےاپنی اردو نظم “شکایت” پیش کی
وہ کہیں تو کس سے
گم ہیں اس کی تمام خوشیاں
ساری دنیا کے درد و رنج
اسے حصار میں لیے ہوئے ہیں
بنا سبب طعنوں کے نشتر
اس کے چہرہ آفتاب پر
بارہا ہیں لگتے
مگر وہ چپ ہے
مگر وہ چپ ہے کہ۔۔۔
ہے خوف اس کو کہ
باپ اور بھائی
شکوے اس کی سنیں کبھی نہ
کہ وقت رخصت
اسے نصیحت کی گئی تھی
کہ۔۔۔
تمھارے گھر سے
تمھاری میت بھلے ہی آئے
لیکن۔۔۔
شکایت کبھی نہ آئے۔
۔۔۔۔۔۔۔۔۔۔*۔۔۔۔۔۔۔۔
پروفیسر احمد شیر راحل
ہم کہاں اور تم کہاں جاناں
اب بھی فرقت ہے درمیاں جاناں
بن تمہارے ہمیں ہی چین نہیں
ورنہ جینے کو ہے جہاں جاناں
۔۔۔۔۔۔۔۔۔۔*۔۔۔۔۔۔۔۔۔۔
نصیر احمد گل جی (براہوئی)
اگہ نے عشق مسونے نا خط بروتا عمر ئٹی
دوتے سلہ تینے آن شباب رنگ ء گوئفک
۔۔۔۔۔۔۔۔۔۔*۔۔۔۔۔۔۔۔۔
پروفیسر نصیب ساگر
پل رہے ہیں مفلسی کی گود میں
ہر تمنا خودکشی کی گود میں
مل سکا نہ راستہ جینے کا اور
جی رہے ہیں شاعری کی گود میں
۔۔۔۔۔۔۔۔۔۔۔*۔۔۔۔۔۔۔۔۔
کبیر احمد عاطف (براہوئی)
رب آن خواہ نیتو درکار زندگی سے
نے اف سما نا سنگت دیدار زندگی سے
۔۔۔۔۔۔۔۔۔۔۔*۔۔۔۔۔۔۔۔
تقریب کے اختتام پر تمام شرکاء نے کاروانِ ادب شال کے ادبی و فکری کردار کو سراہا۔
شفقت کمبوہ کی کتاب بارے ایک تقریب کتاب دوستی فاؤنڈیشن پاکستان ، بلوچستان کے زیرِ اہتمام منععد ہوئی ۔ تقریب میں ممتاز سفر نامہ نگار ، شاعر ، محقق اور مترجم شفقت کمبوہ کے منفرد سفر نامہ ” ڈیورنڈ لائن کے اٌس پار ” پر مقررین نے مدلل اور جامع اظہارِ خیال کرتے ہوئے مصنف کو خراجِ تحسین پیش کیا ۔ تقریب رونمائی کے بعد مشاعرہ ہوا ۔
سینئیر بزرگ صحافی مقبول رانا ہڈی ٹوٹنے کی وجہ سے ہسپتال داخل بیں ، جہاں بی اے ما ل کے ہیلتھ سنٹر میں معروف سرجن ڈاکٹر لال کاکڑ نے انکا مشکل اور پیچیدہ آپریشن کیا ، انکی ٹیم کے انستھیزیہ ڈاکٹر ساجد تھے ۔ ہیلتھ کیئر بی اے مال کے ڈاکٹرز کی ٹیم نے پیچیدہ آپریشن کو ممکن بنا کر معجزہ کر دیا۔
بچوں کے معروف ادیب اور بچوں کے میگزین “کہکشاں” کے پبلیشرز و۔ایڈیٹر سہیل فاروق بھی ان دنوں سخت علیل ہیں ۔ وہ دل کے عارضہ میں مبتلا ہیں .
معروف شاعرہ صدف غوری کا پندرواں شعری مجموعہ “ہجر و وصال” اور بزم صائم کی روح رواں مقبول شاعرہ تسنیم صنم کی کتاب “ہجر کی طاق راتیں” بھی منصفہ شہود پر آ گئی ہے ۔
بلوحستان رائٹرز گلڈ (برگ) نے دونوں شاعرات کو۔خوبصورت تخلیق پر مبارک باد پیش کی ہے ۔