ٹرمپ کا بڑا اعلان: برطانوی منڈیوں میں امریکی مصنوعات کی دھوم متوقع

ٹرمپ کا بڑا اعلان: برطانوی منڈیوں میں امریکی مصنوعات کی دھوم متوقع

واشنگٹن – امریکہ اور برطانیہ کے درمیان ایک تاریخی تجارتی معاہدے کا اعلان ہوا ہے، جسے امریکی صدر ڈونلڈ ٹرمپ نے “ایک نئی معاشی شراکت داری کا آغاز” قرار دیا ہے۔ یہ معاہدہ صدر ٹرمپ کی جانب سے دنیا بھر پر نئے محصولات (ٹیرف) عائد کرنے کے بعد کسی بھی ملک سے پہلا اہم معاہدہ ہے۔

معاہدے کے تحت امریکہ کو اپنی زرعی مصنوعات، گوشت، اسٹیل اور ایلومینیم کو برطانوی منڈیوں تک وسیع رسائی حاصل ہوگی، جبکہ امریکہ کی جانب سے برطانوی کاروں پر عائد کچھ محصولات میں کمی کی جائے گی۔

اس پیش رفت کا اعلان صدر ٹرمپ اور برطانوی وزیراعظم کیئر اسٹارمر کے درمیان ایک ٹیلیفونک گفتگو کے دوران کیا گیا۔ برطانوی وزیراعظم نے اس معاہدے کو “اتحادی افواج کی نازی جرمنی پر فتح کی 80 ویں سالگرہ کے موقع پر ایک تاریخی سنگ میل” قرار دیا۔

اگرچہ معاہدے کی مکمل تفصیلات ابھی سامنے نہیں آئیں، لیکن دونوں ممالک کے حکام نے بتایا ہے کہ مذاکرات کا سلسلہ جاری رہے گا۔ فی الحال امریکہ کی جانب سے برطانیہ پر 10 فیصد عمومی ٹیرف برقرار رہے گا۔

صدر ٹرمپ نے امید ظاہر کی ہے کہ آئندہ چین اور یورپی یونین کے ساتھ بھی تجارتی معاملات میں پیش رفت ممکن ہو گی، جس سے عالمی اقتصادی ماحول میں نئی جہتیں پیدا ہوں گی۔