شاہد رند کی تعیناتی عدالت میں چیلنج! وزیراعلیٰ اور چیف سیکرٹری کو نوٹس

بلوچستان حکومت کے میڈیا کنسلٹنٹ شاہد رند کی تعیناتی کو بلوچستان ہائیکورٹ میں چیلنج کر دیا گیا ہے۔ عدالت عالیہ کے قائم مقام چیف جسٹس روزی خان بڑیچ اور جسٹس سردار احمد حلیمی پر مشتمل دو رکنی بینچ نے درخواست پر سماعت کی۔

درخواست ایڈووکیٹ عبدالصادق خلجی کی جانب سے دائر کی گئی ہے، جس میں مؤقف اختیار کیا گیا ہے کہ شاہد رند کی بطور میڈیا کنسلٹنٹ تقرری قواعد و ضوابط کے خلاف ہے۔

عدالت نے وزیراعلیٰ بلوچستان میر سرفراز بگٹی، شاہد رند، اور چیف سیکرٹری بلوچستان کو نوٹسز جاری کرتے ہوئے ان سے آئندہ سماعت پر تحریری جواب طلب کر لیا ہے۔

یاد رہے کہ حکومت بلوچستان نے کچھ عرصہ قبل شاہد رند کو حکومتی ترجمان و میڈیا کنسلٹنٹ مقرر کیا تھا، جسے اب قانونی طور پر عدالت میں چیلنج کیا گیا ہے۔