ڈپٹی کمشنر پشین میجر (ر) اورنگزیب بادینی نے کہا ہے کہ بلوچستان لیویز فورس مثالی اور بہادر فورس ہے جس پر ہمیں فخر ہے

ڈپٹی کمشنر پشین میجر (ر) اورنگزیب بادینی نے کہا ہے کہ بلوچستان لیویز فورس مثالی اور بہادر فورس ہے جس پر ہمیں فخر ہے بلوچستان بلخصوص پشین میں امن وامان کے حوالے سے لیویز فورس کا اہم کردار رہا ہے. لیویز فورس کے جوانوں نے جرائم اور منشیات کے خاتمے سمیت ہر مشکل وقت میں امن و امان کو برقرار رکھنے کیلئے جانوں کا نذرانہ بھی پیش کیا ہے.

 ان خیالات کا اظہار انہوں نے پشین لیویز کی مختلف مقدمات میں پکڑی جانیوالی تقریباً بارہ سو کلو گرام منشیات کو جوڈیشل مجسٹریٹس کی موجودگی میں تلف کرنے کے موقع پر گفتگو کرتے کیا. اس موقع پر رکن صوبائی اسمبلی عبدالواحد صدیقی، کرنل امان اللہ مینگل، جوڈیشل مجسٹریٹس فیصل حمید، جہانگیر، فائزہ بختاور، ثمینہ نسرین، اسسٹنٹ کمشنر محمد عارف زرکون، اسسٹنٹ کمشنر خانوزئی سعید احمد دمڑ، ملک سعداللہ جان ترین میجر علی محمد ترین اور دیگر موجود تھے. انہوں نے کہا کہ صوبہ بلوچستان کا نوے فیصد ایریا لیویز فورس کے پاس ہے الحمد اللہ ماضی کی نسبت جرائم پر کافی حد تک قابو پا لیا گیا ہے ہماری تربیت یافتہ کیو آر ایف فورس بھی ہر قسم کے چیلنجز سے نمٹنے کیلئے ہمہ وقت تیار وفادار ہے. لیویز فورس نہ صرف عوام کی تحفظ اور امن وامان کے حوالے سے بہتر کام کررہی ہے بلکہ قدرتی آفات سمیت دیگر حادثاتی صورتحال میں بھی لیویز فورس پیش پیش نظر آ رہی ہے. اس موقع پر ڈپٹی کمشنر میجر (ر) اورنگزیب بادینی نے کہا کہ َلیویز ایک ابھرتی ہوئی فورس ہے لیویز فورس جدید خطوط پر استوار کرنے کیلئے صوبائی حکومت اقدامات کر رہی ہے ڈسٹرکٹ میں لیویز تھانوں، ہتھیاروں اور گاڑیوں کی مزید ضرورت ہے انشاءاللہ بہت جلد یہ ضروریات پوری ہوجائیں گی. اس وقت ڈسٹرکٹ میں لیویز کی 880 کے قریب نفری، 44 تھانے اور چیک پوسٹس، بکتربند گاڑی، جی ایس ایم لوکیٹر اور ایمبولینس وغیرہ موجود ہے ڈسٹرکٹ کی لیویز فورس تمام تر خطرات سے نمٹنے کی صلاحیت رکھتی ہے. لیویز فورس جہاں دہشت گردی سے نبردآزما ہے وہی دیگر جرائم کی روک تھام کیلئے بھی سر گرم ہے.