پاکستانی کوہ پیما سرباز علی کا عظیم کارنامہ، 8 ہزار میٹر سے بلند تمام چوٹیاں بغیر آکسیجن سر کر لیں

پاکستان کے مایہ ناز کوہ پیما سرباز علی خان نے کوہ پیمائی کی دنیا میں نئی تاریخ رقم کر دی ہے۔ سرباز علی وہ پہلے پاکستانی بن گئے ہیں جنہوں نے دنیا کی تمام 8,000 میٹر سے بلند 14 چوٹیاں بغیر مصنوعی آکسیجن کے سر کر لی ہیں۔

یہ شاندار سنگِ میل انہوں نے آج کینچن جونگا (8,586 میٹر) کو کامیابی سے سر کر کے مکمل کیا۔ اس سے قبل گزشتہ ماہ انہوں نے اناپورنا کو بھی بغیر آکسیجن سر کیا تھا۔

یاد رہے کہ سرباز علی نے گزشتہ برس ہی تمام 14 بلند ترین چوٹیاں سر کر لی تھیں، تاہم ابتدائی مہمات کے دوران انہوں نے دو چوٹیوں — اناپورنا اور کینچن جونگا — پر آکسیجن استعمال کی تھی۔ انہوں نے ان دونوں کو دوبارہ بغیر آکسیجن سر کر کے یہ شاندار اعزاز مکمل کیا۔

سرباز علی کا یہ کارنامہ نہ صرف پاکستان بلکہ عالمی کوہ پیمائی کی دنیا کے لیے بھی ایک تاریخی سنگِ میل ہے، جو ان کی ہمت، حوصلے اور غیر معمولی صلاحیتوں کا منہ بولتا ثبوت ہے۔