قومی سلیکشن کمیٹی کا اجلاس (آج) ہوگا

کراچی(این این آئی)قومی سلیکشن کمیٹی کا اجلاس چیف سلیکٹر مصباح الحق کی زیر صدارت (آج)ہفتہ کومنعقد ہوگا۔میڈیا رپورٹ کے مطابق مستقبل کی حکمت عملی طے کرنے کے لیے ڈومیسٹک ٹیموں کے چھ کوچز بھی کراچی پہنچیں گے۔چیف سلیکٹر مصباح الحق کی سربراہی میں منعقدہ ہونے والے اجلاس میں تمام کوچز قائد اعظم ٹرافی کے حوالے سے اپنی رپورٹس پیش کریں گے۔اس ضمن میں انتہائی ذمہ دار ذرائع نے بتایا کہ اجلاس میں شریک تمام کوچز مستقبل کے حوالے سے اپنے اپنے منصوبے پیش کریں گے۔ ذرائع نے بتایا کہ تمام کوچز اس حوالے سے بھی اپنے تیارکردہ منصوبے کی تفصیلات پیش کریں گے جو انہوں نے بطور خاص فارغ اوقات میں کھلاڑیوں کو مصروف رکھنے کے لیے تیار کیے ہیں۔ذرائع کے مطابق قائد اعظم ٹرافی کے بعد کھلاڑیوں کی مصروفیت نہیں ہوتی ہے جس کی وجہ سے وہ فارغ ہوتے ہیں اور اس کے منفی اثرات ان کی فٹنس پہ بھی پڑ سکتے ہیں۔ ذرائع کے مطابق اس لیے یہ منصوبہ بنایا گیا کہ کھلاڑیوں کو مصروف رکھا جائے تو تمام کوچز اس حوالے سے اپنی اپنی رپورٹس پیش کریں گے۔اجلاس میں قائد اعظم ٹرافی میں کھلاڑیوں کیڈسپلن کے حوالے سے سامنے آنے والے امور کا بھی جائزہ لیا جائے گا۔