مشرف تکلیف میں ہیں تو نیب سے ردعمل تو آنا تھا، بلاول بھٹو زرداری

اسلام آباد (این این آئی)پاکستان پیپلزپارٹی کے چیئرمین بلاول بھٹو زرداری نے کہا ہے کہ سابق صدر جنرل ریٹائرڈ پرویز مشرف تکلیف میں ہیں تو نیب سے ردعمل تو آنا تھا،آج پاکستان میں نہ عوام ،نہ صحافت اور نہ ہی سیاست آزاد ہے، ہم نے انگریزوں اور آمروں سے آزادی اس لیے نہیں چھینی تھی کہ کسی سلیکٹڈ کے غلام بنیں،یہ عجیب حکومت ، عجیب کابینہ ہے، برطانیہ کا شہری بھی آپ کی کابینہ کا ممبر ہے ،حکومت اب بنے گی تو عوام کی بنے گی اور عوام کی حکمرانی ہو گی۔چیئرمین پیپلزپارٹی بلاول بھٹو زرداری نے ورکرزکنونشن سے خطاب میں کہا کہ ذوالفقارعلی بھٹو اور بے نظیر بھٹو نے عوامی راج کے لیے شہادت قبول کی، افسوس سے کہنا پڑتا ہے یہ وہ جمہوریت نہیں جس کے لیے ہمارے کارکن نے کوڑے کھائے۔ انہوںنے کہاکہ ہم نے پاکستان میں حقیقی جمہوریت قائم کرنی ہے، ہم کسی سلیکٹڈ کے غلام بننے کو تیار نہیں، 2013 کیانتخابات میں پاکستان پیپلزپارٹی نے کہا یہ آر اوز الیکشن ہیں، 2018 کے انتخابات میں سب نے دیکھا تاریخی دھاندلی کی گئی۔انہوںنے کہا کہ ہم پہلی جماعت تھے جس نے قومی اسمبلی میں کہا تھاکہ آپ الیکٹڈ نہیں سلیکٹڈ ہیں، یہ کیسی جمہوریت ہے جہاں نہ صاف وشفاف الیکشن کا موقع ملتاہے، نہ احتجاج کرنے دیا جاتاہے۔27 دسمبر کو راولپنڈی میں پیپلز پارٹی کے جلسے کے حوالے سے بلاول بھٹو زرداری نے کہا کہ ہم نے فیصلہ کرلیا ہے کہ راولپنڈی میں جاکر دنیا کو باور کروائیں گے کہ طاقت کا سرچشمہ عوام ہیں اور اگر اس ملک میں حکمرانی ہوگی تو عوام کی مرضی کی حکمرانی ہوگی۔بلاول بھٹو زرداری نے کہاکہ پرویزمشرف تکلیف میں ہیں تو قومی احتساب بیورو(نیب) سے تو ردعمل آنا تھا، یہ سمجھتے ہیں نیب کی وجہ سے ہم ڈر جائیں گے ، یہ ان کی بھول ہے۔انہوںنے کہاکہ کٹھ پتلی سلیکٹڈ ہمارے پنڈی آنے سے ڈر گیا ہے، اس نے نوٹسز بھیجنے شروع کردئیے ہیں، ہم نے تو ایوب ، ضیاء اور مشرف کی آمریت کا مقابلہ کیا ، تم تو کٹھ پتلی ہو سلیکٹڈ ہو، نہ مشرف کامیاب ہوا ، نہ آپ کامیاب ہوں گے، پیپلز پارٹی کے جیالے بہادر ہیں، وہ کسی نیب نوٹس سے نہیں ڈرتے۔حکومت پر تنقید کرتے ہوئے بلاول بھٹو زرداری نے کہا کہ سلیکٹڈ نے تو وعدہ کیا تھا کہ ایک کروڑ نوکری دیں گے لیکن اقتدار میں آنے کے بعد وہ مزید روزگار چھین رہے ہیں،انہوں نے وعدہ کیا تھا پچاس لاکھ گھر بنائیں گے، انکروچمنٹ کے نام پر غریبوں کے سر سے چھت چھین رہے ہیں۔بلاول بھٹوزرداری کا کہنا تھا کہ یہ عجیب حکومت ، عجیب کابینہ ہے، برطانیہ کا شہری بھی آپ کی کابینہ کا ممبر ہے ،حکومت اب بنے گی تو عوام کی بنے گی اور عوام کی حکمرانی ہو گی۔