ہانیہ عامر کا بالی وُڈ ڈیبیو برقرار، “سردار جی 3” کا ٹریلر وائرل

ہانیہ عامر کا بالی وُڈ ڈیبیو برقرار، “سردار جی 3” کا ٹریلر وائرل

کراچی / ممبئی: پاکستانی اداکارہ ہانیہ عامر کی بالی وُڈ فلم “سردار جی 3” کا ٹریلر ریلیز ہوتے ہی سوشل میڈیا پر وائرل ہو گیا، جس میں انہیں مرکزی کردار میں گلوکار و اداکار دلجیت دوسانجھ کے ساتھ دیکھا جا سکتا ہے۔

فلم کے ٹریلر کی ریلیز سے ان تمام قیاس آرائیوں کو ختم کر دیا گیا ہے جن میں دعویٰ کیا جا رہا تھا کہ 22 اپریل کے پہلگام حملے کے بعد ہانیہ کو فلم سے نکال دیا گیا ہے۔ تاہم دلجیت نے اتوار کو ٹریلر پوسٹ کر کے تصدیق کی کہ ہانیہ عامر فلم کا حصہ ہیں۔

فلم 27 جون کو عالمی سطح پر ریلیز کی جائے گی، تاہم پاکستان بھارت کشیدگی کے باعث اسے بھارت میں سنیما گھروں میں ریلیز نہیں کیا جا رہا، اور نہ ہی ٹریلر بھارت میں یوٹیوب پر دستیاب ہے۔

فلم میں ہانیہ کے ساتھ ناصر چنیوٹی، دانیال خاور اور سلیم البیلا بھی شامل ہیں، جو فلم میں اہم مزاحیہ کردار ادا کر رہے ہیں۔

پاکستانی فنکاروں کی شمولیت پر فیڈریشن آف ویسٹرن انڈیا سنی ایمپلائز (FWICE) نے سینسر بورڈ (CBFC) سے مطالبہ کیا تھا کہ فلم کو سرٹیفکیٹ جاری نہ کیا جائے، جس کے بعد فلمسازوں نے بھارت میں ریلیز نہ کرنے کا فیصلہ کیا۔

یاد رہے، ہانیہ عامر نے ماضی میں بھارتی فوجی آپریشن “سندور” پر تنقید کی تھی، جس کے بعد ان کا انسٹاگرام اکاؤنٹ بھارت میں بلاک کر دیا گیا تھا۔

بھارتی سنیما میں پابندی کے باوجود، فلم کے گانے اور ٹیزرز بھارتی مداح آن لائن پلیٹ فارمز پر دیکھ رہے ہیں، اور فلم کی عالمی کامیابی کے امکانات بدستور روشن ہیں۔