اسرائیل اور ایران نے جنگ بندی کی خلاف ورزی کی ہے، اسرائیل سے سخت ناراض ہوں: صدر ٹرمپ
اسرائیل اور ایران نے جنگ بندی کی خلاف ورزی کی ہے، اسرائیل سے سخت ناراض ہوں: صدر ٹرمپ
– امریکی صدر ڈونلڈ ٹرمپ نے ایران اور اسرائیل دونوں پر جنگ بندی کی خلاف ورزی کا الزام عائد کرتے ہوئے شدید اظہارِ ناراضگی کیا ہے، بالخصوص اسرائیل کے فوری حملے پر انہیں سخت تحفظات ہیں۔
صدر ٹرمپ نے اپنے سوشل میڈیا پلیٹ فارم “ٹروتھ سوشل” پر جاری ایک بیان میں کہا:
“میں ایران اور اسرائیل دونوں سے خوش نہیں ہوں۔ خاص طور پر اسرائیل سے بہت زیادہ ناراض ہوں۔ مجھے یہ بالکل پسند نہیں آیا کہ اسرائیل نے جنگ بندی پر رضامندی کے فوراً بعد حملے کیے۔”
“اسرائیل، وہ بم مت گراؤ!” – ٹرمپ کی سخت وارننگ
صدر ٹرمپ نے ایک سخت پیغام میں اسرائیل کو خبردار کیا:
“اسرائیل! ان بموں کو مت گراؤ۔ اگر تم نے ایسا کیا تو یہ ایک سنگین خلاف ورزی ہوگی۔ فوراً اپنے پائلٹس کو واپس بلاؤ – ابھی!”
یہ بیان اس وقت سامنے آیا ہے جب عالمی برادری نے ایران-اسرائیل سیزفائر کو ایک نازک مگر اہم پیش رفت قرار دیا تھا، تاہم فریقین کی مبینہ خلاف ورزیاں اس عمل کو خطرے میں ڈال سکتی ہیں۔
“ایران کی جوہری صلاحیت مکمل طور پر ختم کردی گئی ہے” – ٹرمپ کا دعویٰ
اپنے بیان میں صدر ٹرمپ نے یہ بھی دعویٰ کیا کہ:
“امریکا نے ایران کی جوہری صلاحیت کو مکمل طور پر ختم کر دیا ہے۔ ایران اب کبھی دوبارہ جوہری پروگرام شروع نہیں کر سکے گا۔”
صدر کے اس دعوے پر ابھی تک ایرانی حکام کی جانب سے کوئی باضابطہ ردعمل سامنے نہیں آیا، تاہم یہ بیان خطے میں ایک نئی کشیدگی کو جنم دے سکتا ہے۔