قومی اسمبلی اجلاس ، وفاقی وزیر انسداد منشیات علی محمد خان مہر کے انتقال پرمتفقہ طور پر تعزیتی قرارداد منظور

اسلام آباد قومی اسمبلی میں وفاقی وزیر برائے انسداد منشیات علی محمد خان مہر کے انتقال پرمتفقہ طور پر تعزیتی قرارداد کی منظوری دی گئی،قرارداد میں علی محمد مہر کی عوام اور جمہوریت کے لئے خدمات پر انہیں خراج تحسین پیش کیا گیا، ارکان اسمبلی نے وفاقی وزیر برائے انسداد منشیات علی محمد خان مہر کے انتقال پر تعزیت کا اظہار کرتے ہوئے کہا ہے کہ سردار علی محمد مہر غریب پرور ‘ شفیق اور مہربان انسان تھے، ان کی خدمات کو خراج تحسین پیش کرتے ہیں،انہوں نے پاکستان،گھوٹکی اور سندھ کے عوام کے لئے گرانقدر خدمات انجام دیں، ان کی خدمات ناقابل فراموش ہیں، وہ شفیق اور کم گو انسان تھے، وہ منجھے ہوئے سیاستدان تھے اور پاکستان کی سیاست میں ان کا ایک مقام تھا۔ ان خیالات کا اظہار عامر ڈوگر، راجہ پرویز اشرف، خواجہ آصف و دیگر نے اظہار خیال کرتے ہوئے کیا جبکہ سپیکرقو می اسمبلی اسد قیصر نے ایوان کی روایت کے مطابق علی محمد مہر کے انتقال پر ایجنڈا کی کارروائی آگے نہیں بڑھائی اورقومی اسمبلی کا اجلاس پیر کی دوپہر 2 بجے تک ملتوی کردیا۔ جمعہ کو قومی اسمبلی میں وفاقی وزیر برائے انسداد منشیات علی محمد خان مہر کے انتقال پر متفقہ طور پر تعزیتی قرارداد کی منظوری دی گئی۔ قومی اسمبلی میں وزیر مملکت برائے پارلیمانی امور علی محمد خان نے قرارداد پیش کی جس میں علی محمد مہر کی عوام اور جمہوریت کے لئے خدمات پر انہیں خراج تحسین پیش کیا گیا۔ متفقہ قرارداد میں ان کے انتقال پر افسوس کا اظہار کیا گیا۔ ایوان نے قرارداد کی متفقہ طور پر منظوری دے دی۔قومی اسمبلی کے اراکین نے وفاقی وزیر علی محمد خان مہر مرحوم کے انتقال پر گہرے رنج و غم کا اظہار کرتے ہوئے کہا ہے کہ مرحوم شفیق‘ غریب پرور اور مہربان انسان تھے‘ ان کا پاکستان کی سیاست میں مقام تھا۔ پاکستان تحریک انصاف کے رکن قومی اسمبلی عامر ڈوگر نے کہا کہ سردار علی محمد مہر غریب پرور ‘ شفیق اور مہربان انسان تھے۔ وہ تین مرتبہ اس ہائوس کے ممبر رہے ہیں۔ گھوٹکی اور سندھ کے عوام کے لئے انہوں نے بہت کام کیا۔ ان کی خدمات ناقابل فراموش ہیں۔ وہ شفیق اور کم گو انسان تھے۔ انہوں نے مرحوم کے لئے مغفرت اور لواحقین کے لئے صبر جمیل کی دعا کی۔ پیپلز پارٹی کے راہنما راجہ پرویز اشرف نے کہا کہ علی محمد مہر کے انتقال پر سب لوگ دکھی ہیں میں اپنی اور پارٹی کی طرف سے غمزدہ خاندان کے ساتھ افسوس کا اظہار کرتا ہوں۔ وہ منجھے ہوئے سیاستدان تھے اور پاکستان کی سیاست میں ان کا ایک مقام تھا۔ مسلم لیگ (ن) کے خواجہ محمد آصف نے کہا کہ مرحوم اور ان کے بزرگوں کے ساتھ ایک طویل عرصہ رفاقت رہی ہے۔ یہ وضع دار لوگ ہیں۔ اپنی جماعت اور قیادت کی طرف سے افسوس کا اظہار کرتا ہوں۔ اللہ ان کی اگلی منزلیں آسان کرے۔ فاروق اعظم نے کہا کہ علی محمد خان مہر اچھے اور عظیم انسان تھے‘ وہ ہمارے کولیگ بھی رہے ہیں۔ عبدالاکبر چترالی نے کہا کہ علی محمد مہر کے ساتھ اس ایوان میں ساتھ رہا ہے۔ ہم ان کی خدمات کو خراج تحسین پیش کرتے ہیں۔ سپیکر نے کہا کہ ایوان کی روایت کے مطابق علی محمد مہر کے انتقال پر ایجنڈا کی کارروائی آگے نہیں بڑھائی جائے گی۔ اس کے ساتھ ہی انہوں نے قومی اسمبلی کا اجلاس پیر کی دوپہر 2 بجے تک ملتوی کردیا۔(و خ )