پی ایس ایل میں 2 نئی ٹیموں کا اضافہ؟
پاکستان سپر لیگ (پی ایس ایل) کے دسویں سیزن کے آغاز سے قبل ہی بورڈ 11ویں ایڈیشن کیلئے 2 نئی فرنچائزز کے خریدار سامنے لے آیا ہے۔ ذرائع کے مطابق امریکی کرکٹ میں متحرک 2 پاکستانی شخصیات نے پاکستان سپر لیگ (پی ایس ایل) کی ٹیمیں خریدنے میں دلچسپی کا اظہار کیا ہے، جس پر بورڈ کے نمائندگان کے ساتھ بات چیت ہوئی ہے۔ذرائع کا کہنا ہے کہ دونوں شخصیات میں سے کوئی ایک پاکستان سپر لیگ کیلئے ایک ٹیم خرید سکتا ہے،تاہم ملکی کرکٹ کے ایک اہم اسٹیک ہولڈر نے بھی ٹیم خریدنے میں دلچسپی کا اظہار کیا ہے۔ واضح رہے کہ بورڈ نے اس خواہش کا اظہار کیا ہے کہ مسقبل میں پی ایس ایل کے بعض میچز کا انعقاد بھی امریکا میں کرایا جائے،
اس حوالے سے لیگ کے سربراہ سلمان نصیر ان دنوں امریکا کے مختلف شہروں کا دورہ کر رہے ہیں۔ذہن نشین رہے کہ اس سے پہلے چیئرمین پی سی بی محسن نقوی بطور ملکی وزیر داخلہ نئے امریکی صدر ڈونلڈ ٹرمپ کی تقریب حلف برداری میں شرکت کیلیے بھی وہاں گئے تھے، جہاں انہوں نے امریکی کرکٹ میں متحرک 2 پاکستانی آفیشلز سے ملاقات میں اس خواہش کا اظہار کیا تھا۔ واضح رہے کہ امریکی کرکٹ لیگ میں بیشتر ٹیم مالکان بھارتی ہیں، کرکٹ ایسوسی ایشن کا بھی یہی حال ہے، ایسے میں پاکستان کیلئے وہاں فوری طور پر قدم جمانا آسان نہیں ہوگا، البتہ بڑی مارکیٹ کو تنہا بھارت کیلئے چھوڑ دینا بھی مناسب نہیں، اسی لیے پاکستان کرکٹ بورڈ مختلف راہیں تلاش کر رہا ہے۔ خیال رہے کہ پاکستان سپر لیگ (پی ایس ایل) کے 11ویں ایڈیشن میں 2 نئی ٹیمیں بھی شامل ہوں گی۔