صوبائی حکومت ترقیاتی منصوبوں پر خطیر رقم خرچ کر رہی ہے، ضیاءلانگو

کوئٹہ(ویب ڈیسک )صوبائی وزیر داخلہ میر ضیا اللہ لانگو نے کہا ہے کہ صوبائی حکومت ترقیاتی منصوبوں پر خطیر رقم خرچ کر رہی ہے جس سے ان اضلاع میں ترقی کے ایک نئے دور کا آغاز ہوگا اورعوام کی محرومیوں کا ازالہ ہوگا۔، اضلاع میں ترقیاتی منصوبوں کے مقدار اور معیار پر کسی بھی قسم کا سمجھوتہ نہیں کیا جائے گا، آبادی اور لوگوں کی ضرورت کو مدنظر رکھتے ہوئے اضلاع کے تمام علاقوں میں یکساں ترقیاتی منصوبے رکھے جائیں گے اور اس بات کو یقینی بنایا جائے

کہ ترقیاتی منصوبوں کے ثمرات زیادہ سے زیادہ آبادی کو پہنچے۔ ان خیالات کا اظہار انہوں نے ترقیاتی منصوبوں پر پیشرفت کے حوالے سے منعقدہ جائزہ اجلاس کی صدارت کرتے ہوئے کیا۔ اس موقع پر ایس پی قلات ارباب امجدکاسی ، ایکسئین حاجی محمدانور نیچاری ، چیف آفیسر عطااللہ بازئی، ڈی ایچ اوڈاکٹر نصراللہ لانگو، ڈی ایس ایم ڈاکٹر قدیر، ایم ایس علی اکبر نیچاری، اسسٹنٹ انجینئر ندیم گچکی، فارسٹ آفیسر فرید رند، کےعلاوہ دیگر متعلقہ حکام نے اجلاس میں شرکت کی۔ اجلاس کے شرکا نے اضلاع میں مختلف شعبوں میں جاری اور نئے ترقیاتی منصوبوں پر تفصیلی بریفنگ دی گئی۔

وزیر داخلہ نے تمام متعلقہ محکموں کے حکام کواضلاع کے ترقیاتی منصوبوں پر عملدرآمد کی رفتار کو مزید تیز کرنے اور ان منصوبوں کے معیار کو یقینی بنانے کے لئے مانیٹرنگ کے نظام کو موثر بنانے کی ہدایت کرتے ہوئے کہا کہ تعمیراتی کاموں کے معیار پر کسی قسم کا سمجھوتہ نہیں کیا جائے گا، متعلقہ حکام فیلڈ وزٹ کریں اور ترقیاتی کاموں کا خود جائزہ لیں تاکہ معیاری تعمیراتی کام کو ہر صورت یقینی بنایا جاسکے۔ وزیر داخلہ نے ترقیاتی سکیموں کی نشاندھی کرتے وقت زیادہ سے زیادہ آبادی کو مدنظر رکھنے اور میرٹ کی بنیاد پر ترقیاتی سکیمیں شروع کرنے کی بھی ہدایت کی ۔

وزیر داخلہ کا کہنا تھا کی علاقوں کی پائیدار بنیادوں پر ترقی یافتہ بنانا اور ان علاقوں کے عوام کی عشروں پر محیط پسماندگی اور محرومیوں کا آزالہ کرنا ہے جس کے لیے حکومت تمام وسائل کی کمی کو آڑے نہیں آنے دے گی۔ انہوں نے تمام متعلقہ محکموں پر واضح کیا کہ حکومت اضلاع کی ترقی پر جو خطیر رقم خرچ کر رہی ہے اس کا فائدہ بروقت اور بلا تاخیر عوام تک پہنچا چاہئے اور حکومت اس سلسلے میں کسی بھی قسم کی کوتاہی اور سست روی برداشت نہیں کرے گی۔

وزیر داخلہ نے محمکہ ترقیات و منصوبہ بندی کے حکام کو ہدایت کی کہ وہ گذشتہ دو ڈھائی سالوں کے دوراں اضلاع میں شروع کئے گئے تمام ترقیاتی منصوبوں پر عملی پیشرفت اور تعمیراتی کاموں کے معیار کا تفصیلی جائزہ لے کر رپورٹ پیش کریں۔انہوںنے محکمہ صحت ضلع قلات کے غیر حاضر ڈاکٹروں کے خلاف محکمانہ کارروائی عمل میں لائی جانے کی ہدایات بھی متعلقہ حکام دی اور کہا کہ اس میں کسی قسم کی کوتاہی برداشت نہیں کی جائے گی