کارکنوں کی تحقیر کرنے والے طاغوتی سیاست کے علمبردار ہیں، مولانا محمد شیرانی

جے یو آئی پاکستان کے مرکزی قائد مولانا محمد خان شیرانی نے کہاہے کہ موجودہ سیاسی لیڈروں کا المیہ یہ ہے کہ وہ اپنی ذات کے بارے میں حقیقت پسند اور عملیت پسند ہوتے ہیں جبکہ کارکنوں کو نظریات کے نام پر خیالی مقاصد اور حقیقت سے دور اہداف کے تعاقب میں مصروف رکھتے ہیں اس دوغلاپن کیلئے ضروری ہوتاہے کہ عام کارکنوں کو شعور و بصیرت سے عاری اور اندھے جزبات کا خوگر بنایا جائے انہوں نے کہا ہے کہ اسلام ہر انسان سے تقاضا کرتا ہے کہ وہ زندگی کے ہر انفرادی عمل اور اجتماعی معاملے میں عقل و فہم سے استفادہ کرے تدبر اور معقولیت کے بغیر معاملات میں کودپڑنا چارپایوں کی خصوصیت ہے اس وجہ سے جو لوگ اجتماعی اور جماعتی امور میں سوچے سمجھے بغیر پیروی کرتے ہیں انہیں پھر بھیڑ بکریوں کی طرح ہانکا جاتاہے بے مقصد سرگرمیوں میں مشغول ہونا بجائے خود عقل کے استعمال کے خدائی حکم سے روگردانی کی سزا ہے اس لئے کہ اسلام میں صرف دھوکہ اور خیانت کرنے والے ہی مجرم نہیں ہیں بلکہ اپنی مرضی سے مسلسل فریب کھانے والے لوگوں کو بھی اپنے کئے کرائے کا نہ تو اس دنیا میں کوئی انعام ملتاہے اور نہ ہی وہ اپنے آپ کیلئے آخرت کی جنت کما رہے ہوتے ہیں انہوں نے کہاہے کہ خدا پرستی کی سیاست میں عام اور معمولی لوگوں میں وقار وجاہت اور معاملہ فہمی کی صلاحیت پیدا کی جاتی ہے جبکہ طاغوتی سیاست میں اپنے پیروکاروں کو ذلت کا عادی بناکر انہیں جاہل اور غافل رکھا جاتاہے کارکنوں کی تحقیر کرنے والے طاغوتی سیاست کے علمبردار ہیں اسلام کی تعلیم یہ ہے کہ کسی بھی خیر اور بھلائی کا راستہ ذلت سے ہوکر نہیں گزرتا اس لئے تمام کارکنوں کو چاہیے کہ ٹھنڈے دل و دماغ کے ساتھ حالات پر غورو فکر کے بعد اپنی صلاحیتوں کے استعمال سے متعلق فیصلہ کریں