جہلم، اڑھائی کروڑ تاوان کے لیے اغوا نجی ہوٹل کا مالک 7 دن بعد بازیاب ، پانچ اغوا کار گرفتار

جہلم: جہلم پولیس نے کارروائی کرتے ہوئے اڑھائی کروڑ تاوان کے لیے اغوا کیا گیا نجی ہوٹل کا مالک 7 دن میں تاوان کی رقم دینے سے قبل ہی بازیاب کروا لیا جبکہ پانچ اغوا کار بھی گرفتارکر لیے گئے، گرفتار ہونیوالے اغوا کاروں میں برطانوی نژاد خاتون سمیت لاہور کے چار ملزمان شامل ہیں، مزید ملزمان کی گرفتاری جلد متوقع ہے جن میں پنجاب پولیس کے دوجوان بھی شامل ہیں۔ تفصیلات کے مطابق چند روز قبل نجی ہوٹل کے مالک کو اڑھائی کروڑ کے تاوان کے لیے اغوا کیا گیا تھا ، تھانہ صدر پولیس نے انتہائی مہارت سے 7دن کے اندر تاوان کی رقم دینے سے قبل ہی مغوی عارف محمود کو بازیاب کروا لیا اور پانچ ملزمان کو گرفتار کر لیا گیا۔گرفتار ہونیوالے اغوا کاروں میں برطانوی نژاد خاتون سمیت لاہور سے تعلق رکھنے والے چار ملزمان شامل ہیں، اغوا کاروں نے مغوی عارف محمود کا واٹس ایپ استعمال کرتے ہوئے مغوی کے بھائیوں سے انگلینڈ میں تاوان کی رقم ایک لاکھ پاونڈ کی ڈیمانڈ کی تھی۔پولیس کے مطابق اس سارے معاملے میں ماسٹر مائنڈ لاہور کا رہائشی تھا جس کیخلاف لاہور کے مختلف تھانوں میں سو سے زائد مقدمات درج ہیں، اغوا میں شامل پنجاب پولیس کے دوجوانوں سمیت دیگر ملزمان کو گرفتار کر لیا جائے گا۔اغوا میں ملوث پنجاب پولیس کے جوانوں کا تعلق لاہور سے ہے، پولیس کے مطابق گرفتار ملزمان کی شناخت پریڈ کروا دی گئی ہے، اب ملزمان جسمانی ریمانڈ پر ہیں۔