گلگت بلتستان پولیس اہلکاروں پر ٹک ٹاک استعمال کی پابندی

گلگت بلتستان پولیس نے اپنے اہلکاروں کے لیے ٹک ٹاک کے استعمال پر مکمل پابندی عائد کردی ہے۔ انسپکٹر جنرل پولیس کے دفتر سے جاری نوٹیفکیشن کے مطابق فورس کے نظم و ضبط، وقار اور یکسانیت کو برقرار رکھنے کے لیے یہ فیصلہ کیا گیا ہے۔

نوٹیفکیشن میں واضح کیا گیا ہے کہ کوئی بھی پولیس افسر یا اہلکار ٹک ٹاک استعمال نہیں کرے گا، بصورت دیگر اس کے خلاف سخت محکمانہ کارروائی عمل میں لائی جائے گی۔ تمام ڈسٹرکٹ پولیس افسران اور یونٹ سربراہان کو ہدایت دی گئی ہے کہ وہ یہ پیغام اپنے ماتحت اہلکاروں تک پہنچائیں اور اس پر سختی سے عمل درآمد کرائیں۔

یاد رہے کہ جولائی میں اسلام آباد پولیس کے دو اہلکاروں کو وردی میں ٹک ٹاک ویڈیوز بنانے اور اپ لوڈ کرنے پر معطل کیا گیا تھا جبکہ درجنوں اہلکاروں کو اپنے اکاؤنٹس ڈیلیٹ کرنے کے احکامات دیے گئے تھے۔ اس سے قبل مارچ میں پنجاب پولیس نے بھی اہلکاروں کو سوشل میڈیا پر حکومتی پالیسیوں کے خلاف نامناسب خیالات کے اظہار سے روکنے کے لیے نوٹیفکیشن جاری کیا تھا۔