پاکستان میں سخت سردی کی پیش گوئی بے بنیاد قرار

پاکستان میں سخت سردی کی پیش گوئی بے بنیاد قرار

Pakistan Meteorological Department نے سوشل میڈیا پر گردش کرنے والی ان خبروں کی تردید کی ہے جن میں رواں سال پاکستان میں ’’سخت ترین موسمِ سرما‘‘ کی پیش گوئی کی گئی تھی۔ محکمے نے ایسی رپورٹس کو سائنسی طور پر بے بنیاد اور گمراہ کن قرار دیا ہے۔

محکمے کے وضاحتی بیان کے مطابق یہ دعوے نہ تو محکمے کی اپنی موسمیاتی پیش گوئی سے مطابقت رکھتے ہیں اور نہ ہی عالمی موسمیاتی ڈیٹا سے۔ دسمبر سے فروری کے لیے جاری ونٹر آؤٹ لک کے مطابق ملک کے بیشتر علاقوں میں معمول کے مطابق یا معمول سے کچھ کم بارش اور قدرے زیادہ درجہ حرارت متوقع ہے۔

محکمہ موسمیات نے کہا کہ مغربی ہواؤں کے باعث عارضی سرد لہریں ضرور آسکتی ہیں، تاہم کسی غیر معمولی یا ریکارڈ توڑ سردی کی سائنسی بنیاد موجود نہیں۔

ماہرین کے مطابق بحرالکاہل کے خطِ استوا پر اس وقت ہلکی سے معتدل La Niña کی صورتحال پائی جا رہی ہے، جو ماضی میں جنوبی و جنوب مغربی ایشیا، بشمول پاکستان، میں سرد موسم کی شدت میں کمی اور بارشوں میں کمی سے جڑی رہی ہے۔ اس رجحان کے نتیجے میں شمالی اور مغربی علاقوں میں برفباری اور بارش معمول سے کم جبکہ درجہ حرارت نسبتاً معتدل رہنے کا امکان ہے۔

محکمے نے عوام اور میڈیا اداروں سے اپیل کی ہے کہ وہ صرف آفیشل ویب سائٹ اور تصدیق شدہ ذرائع سے جاری ہونے والی پیش گوئیوں پر انحصار کریں تاکہ غیر مصدقہ اطلاعات سے پیدا ہونے والے خوف اور غلط فہمیوں سے بچا جا سکے۔

محکمہ موسمیات نے یقین دہانی کرائی کہ وہ World Meteorological Organization کے معیار کے مطابق درست، شواہد پر مبنی اور بروقت موسمی پیش گوئیاں جاری کرتا رہے گا تاکہ عوامی تحفظ اور پیشگی انتظامات کو یقینی بنایا جا سکے۔