مستونگ: ریلوے ٹریک کے قریب دھماکا، جانی نقصان نہیں

کوئٹہ: ضلع مستونگ کے علاقے دشت میں ریلوے ٹریک کے قریب دھماکا ہوا۔ پولیس کے مطابق واقعے میں کوئی جانی نقصان نہیں ہوا۔

دھماکے کے بعد سیکیورٹی فورسز اور پولیس کی بھاری نفری جائے وقوعہ پر پہنچ گئی اور علاقے کو گھیرے میں لے لیا۔ بم ڈسپوزل اسکواڈ کو بھی طلب کیا گیا تاکہ شواہد اکٹھے کیے جا سکیں۔

پولیس حکام کا کہنا ہے کہ دھماکے کی نوعیت جاننے اور اس کے پسِ پردہ عناصر تک پہنچنے کے لیے تحقیقات جاری ہیں۔

یاد رہے کہ بلوچستان ایک بار پھر دہشت گردوں کے نشانے پر ہے۔ صرف ستمبر کے دوران صوبے میں دہشت گردی کے 9 واقعات پیش آئے جن میں 32 افراد جاں بحق اور 47 زخمی ہوئے۔ ان حملوں میں سیاسی اجتماعات، سیکیورٹی فورسز اور عام شہری نشانہ بنے۔