وزیراعظم شہباز شریف کی نیویارک میں اہم ملاقاتیں

اقوام متحدہ کی جنرل اسمبلی کے موقع پر وزیراعظم پاکستان شہباز شریف نے نیویارک میں عرب اسلامی سربراہی اجلاس میں شرکت کی۔ اجلاس کے اختتام پر امریکی صدر ڈونلڈ ٹرمپ نے وزیراعظم شہباز شریف اور نائب وزیراعظم اسحاق ڈار سے غیر رسمی ملاقات کی۔ اس موقع پر دونوں رہنماؤں کے درمیان خوشگوار ماحول میں مختصر گفتگو اور مصافحہ ہوا۔

ترک صدر رجب طیب اردوان نے امریکی صدر اور مسلم ممالک کے رہنماؤں کی اس ملاقات کو انتہائی مفید قرار دیا۔

اس سے قبل وزیراعظم شہباز شریف نے کویت کے ولی عہد سے ملاقات کی، جس میں مشرق وسطیٰ کی صورتحال سمیت علاقائی اور عالمی امور پر تبادلہ خیال ہوا۔ کویتی ولی عہد نے فلسطینی عوام پر ڈھائے جانے والے مظالم کو اجاگر کرنے کے لیے پاکستان کی سفارتی کوششوں کو سراہا، جبکہ دونوں رہنماؤں نے دو طرفہ اور کثیر جہتی تعاون کو مزید مستحکم بنانے کے عزم کا اظہار کیا۔