ہم سب کیلئے کچن گارڈننگ بہت اہم اور مفید ہے،گورنر بلوچستان

گورنربلوچستان جعفرخان مندوخیل نے کہا ہے کہ ہم سب کیلئے کچن گارڈننگ بہت اہم اور مفید ہے۔ مہنگائی کے اس دور میں اگر کسی کو کچن گارڈن سے معیاری سبزیاں بھی مفت مل جائے تو یہ ایک بہت بڑی بات ہے۔ گھر میں کچن گارڈن رکھ کر، ہم بغیر کسی مالی اخراجات تازہ سبزیاں حاصل کر سکتے ہیں۔ انٹرنیشنل واٹر مینجمنٹ انسٹیٹیوٹ (IWMI) کی اس تقریب کے بہت مثبت اثرات مرتب ہونگے. ان خیالات کا اظہار انہوں نے یونیورسٹی آف بلوچستان میں کیچن گارڈننگ کے حوالے منعقدہ تقریب کے شرکاء سے خطاب کرتے ہوئے کیا. تقریب میں وائس چانسلر پروفیسر ڈاکٹر ظہور بازئی، وائس چانسلر بیوٹمز یونیورسٹی ڈاکٹر خالد حفیظ اور انٹرنیشنل واٹر مینجمنٹ انسٹیٹیوٹ کے ڈاکٹر محمد ارشد سمیت ریسرچرز اور یونیورسٹی اسٹوڈنٹس کی ایک بڑی تعداد موجود تھی. شرکاء سے خطاب میں گورنربلوچستان جعفرخان مندوخیل نے کچن گارڈننگ کی اہمیت کو اجاگر کرتے ہوئے کہا کہ باورچی خانہ ہر گھر کا متحرک دل ہے. کچن گارڈننگ مالی اخراجات سے نجات دلاتا ہے ۔ اپنے کھانے کی اشیاء خود اگانے سے، ہم روزمرہ کے اخراجات کو کم کر سکتے ہیں جو سپر مارکیٹ کے مہنگے نامیاتی کھانے کیلئے مختص کیے جاتے ہیں۔ فوڈ سورسنگ میں یہ دانشمندانہ تبدیلی گھر کے انتظام پر بھی مثبت اثر چھوڑتی ہے۔ گورنر مندوخیل نے کہا کہ کیچن گارڈن کے دیگر فوائد کے علاوہ اس کے کے ماحولیاتی فوائد کو بھی نظر انداز نہیں کیا جا سکتا۔ انہوں نے کہا کہ کچن گارڈننگ کا منصوبہ ہمیں زندگی کا ایک نیا طریقہ سکھاتا ہے۔ خاص طور پر ان لوگوں کے لیے جو شہر کے چھوٹے گھروں میں رہتے ہیں۔ مجھے یقین ہے کہ کچن گارڈننگ کا تصور آپ کی زندگی، آپ کی صحت اور فطرت کے ساتھ آپ کے تعلق کو بدل دے گا۔ تو آئیے اس پیغام کو صوبے کے کونے کونے تک پہنچائیں۔ آخر میں گورنربلوچستان جعفرخان مندوخیل نے محقیقن اور منتظمین میں یادگاری شیلڈز اور اسناد تقسیم کیے گئے۔