بلوچستان بورڈ کوئٹہ میں امتحانی ریکارڈ میں ہیرا پھیری بے نقاب

اینٹی کرپشن اسٹیبلشمنٹ بلوچستان کو اطلاعات موصول ہوئیں کہ بلوچستان بورڈ آف انٹرمیڈیٹ اینڈ سیکنڈری ایجوکیشن، کوئٹہ کے بعض اہلکار کرپشن اور امتحانی ریکارڈ میں غیر قانونی رد و بدل میں ملوث ہیں۔ بدعنوانیاں خاص طور پر ہائر سیکنڈری اسکول سرٹیفکیٹ 2024 کے نتائج میں سامنے آئیں۔

تحقیقات سے پتہ چلا کہ امتحانی نمبروں میں تبدیلی، ڈی ایم سی میں ردو بدل اور آئی ٹی سسٹم تک غیر قانونی رسائی کے ذریعے ریکارڈ میں ہیرا پھیری کی گئی۔ سپر ایڈمن آئی ڈی استعمال کرتے ہوئے نتائج کے اعلان سے قبل کمپیوٹرائزڈ ریکارڈ میں رد و بدل کیا گیا۔

انکوائری ٹیم کے مطابق، سسٹم اینالسٹ محمد اویس اور کمپیوٹر پروگرامر وسیم نور باہمی ملی بھگت سے امتحانی ریکارڈ میں غیر قانونی تبدیلی کے مرتکب پائے گئے۔ ان کے خلاف ڈائریکٹر جنرل اینٹی کرپشن کی منظوری سے مقدمہ درج کر کے انہیں گرفتار کر لیا گیا، جبکہ مزید گرفتاریاں متوقع ہیں۔

یہ اقدامات بلوچستان ایمپلائز ایفیشنسی اینڈ ڈسپلن ایکٹ 2011 اور پاکستان پینل کوڈ 1860 کی متعلقہ دفعات کے تحت سنگین بدعنوانی کے زمرے میں آتے ہیں۔