بھارتی قبضے کے 77 سال، آج یومِ سیاہ بھرپور انداز میں منایا جا رہا ہے

بھارتی قبضے کے 77 سال، آج یومِ سیاہ بھرپور انداز میں منایا جا رہا ہے

مقبوضہ جموں و کشمیر پر بھارتی قبضے کے 77 سال مکمل ہونے پر آج پاکستان، آزاد جموں و کشمیر، گلگت بلتستان اور دنیا بھر میں کشمیری کمیونٹیز کی جانب سے یومِ سیاہ عقیدت و احترام کے ساتھ منایا جا رہا ہے۔

دن کا آغاز صبح 10 بجے ایک منٹ کی خاموشی سے ہوا تاکہ کشمیری شہداء کو خراجِ عقیدت پیش کیا جا سکے جنہوں نے آزادی کی خاطر اپنی جانیں قربان کیں۔

ملک بھر میں احتجاجی ریلیاں، یکجہتی واکس، سیمینارز اور تصویری نمائشوں کا انعقاد کیا جا رہا ہے جن کا مقصد بھارتی مظالم کی مذمت اور کشمیری عوام کے ساتھ یکجہتی کا اظہار ہے۔

اسلام آباد میں دفترِ خارجہ سے ڈی چوک تک مرکزی یکجہتی واک منعقد کی جا رہی ہے جس میں مختلف وزارتوں کے نمائندے، طلبہ، سول سوسائٹی اور شہری بڑی تعداد میں شریک ہیں۔ شاہراہِ دستور، پارلیمنٹ ہاؤس اور ڈی چوک پر “کشمیر بنے گا پاکستان” کے بینرز اور پوسٹرز آویزاں کیے گئے ہیں۔

وفاقی حکومت کی زیرِ نگرانی کشمیر میں بھارتی مظالم کو عالمی سطح پر اجاگر کرنے کے لیے خصوصی مہم جاری ہے، جس کے لیے وزارتِ اطلاعات، وزارتِ خارجہ، پی ٹی اے اور اسلام آباد پولیس کی جانب سے بھرپور انتظامات کیے گئے ہیں۔

اسی طرح کراچی، لاہور، پشاور، مظفرآباد اور گلگت سمیت ملک کے دیگر بڑے شہروں میں بھی یومِ سیاہ کے موقع پر احتجاجی واکس اور ریلیاں نکالی جا رہی ہیں۔

مختلف مقامات پر مقررین نے عالمی برادری سے مطالبہ کیا کہ وہ مقبوضہ کشمیر میں انسانی حقوق کی سنگین خلاف ورزیوں کا نوٹس لے اور کشمیری عوام کو اُن کا حقِ خودارادیت دلانے کے لیے عملی اقدامات کرے۔

تعلیمی اداروں میں بھی یومِ سیاہ کی مناسبت سے خصوصی تقریبات منعقد کی جا رہی ہیں جن میں طلبہ کشمیری عوام سے یکجہتی کا اظہار کر رہے ہیں اور آزادی کے عزم کو دہرا رہے ہیں۔

آج کا دن پوری پاکستانی قوم کی جانب سے کشمیری عوام کے ساتھ ایمان، عزم اور یکجہتی کے تجدیدِ عہد کا دن قرار دیا جا رہا ہے۔