مسلسل مندی سے سرمایہ کاروں کو بھاری نقصان

مسلسل مندی سے سرمایہ کاروں کو بھاری نقصان

پاکستان اسٹاک ایکسچینج میں کاروباری ہفتے کے پہلے روز شدید مندی دیکھی گئی، جس کے نتیجے میں 100 انڈیکس 1,432 پوائنٹس گر کر 1 لاکھ 61 ہزار 871 پوائنٹس کی سطح پر آ گیا۔

کاروبار کا آغاز منفی رجحان سے ہوا، جس کے بعد سرمایہ کاروں نے محتاط رویہ اختیار کیا اور شیئرز کی فروخت میں اضافہ دیکھنے میں آیا۔ گزشتہ ہفتے کے اختتامی روز بھی مارکیٹ میں مندی دیکھی گئی تھی، جس کا سلسلہ آج بھی برقرار رہا۔

مارکیٹ میں مسلسل گراوٹ کے باعث سرمایہ کاروں کو بھاری نقصان اٹھانا پڑ رہا ہے اور سرمایہ کاری کا اعتماد متاثر ہوا ہے۔

دوسری جانب زرمبادلہ کی منڈی میں بھی معمولی اتار چڑھاؤ جاری ہے۔ امریکی ڈالر کی قیمت میں صرف ایک پیسہ کمی ہوئی ہے، جس کے بعد انٹربینک میں ڈالر 281 روپے پر ٹریڈ کر رہا ہے۔

ماہرین کے مطابق اسٹاک مارکیٹ میں غیر یقینی صورت حال کی بڑی وجہ عالمی مالیاتی دباؤ، مقامی سرمایہ کاروں کی غیر یقینی توقعات اور سیاسی معاشی عوامل ہیں، جن کے باعث مارکیٹ کا استحکام متاثر ہو رہا ہے۔