پاکستان کی بحری تاریخ میں نیا سنگِ میل ، سب سے بڑا کنٹینر بردار جہاز کراچی پہنچ گیا

کراچی (ویب ڈیسک) — پاکستان کی بحری تاریخ میں ایک اور اہم سنگِ میل عبور کر لیا گیا۔ دنیا کے جدید ترین اور سب سے بڑے کنٹینر بردار جہاز ایم ایس سی مِکول (MSC Mikol) نے ساوتھ ایشیا پاکستان ٹرمینل (SAPT) پر کامیابی سے لنگر انداز ہو کر تاریخ رقم کر دی۔

وفاقی وزیرِ بحری امور محمد جنید انوار چوہدری نے جہاز کی آمد کا خیر مقدم کرتے ہوئے کہا کہ “ایم ایس سی مِکول” کی آمد پاکستان کے لیے ایک تاریخی لمحہ ہے۔ یہ پیشرفت اس بات کا واضح ثبوت ہے کہ بین الاقوامی شپنگ لائنز کو پاکستان کی بندرگاہی صلاحیتوں اور استعداد پر مکمل اعتماد ہے۔

400 میٹر لمبے اور 24 ہزار ٹی ای یو ایس گنجائش والے اس جدید جہاز کی کامیاب ہینڈلنگ نے پاکستان کو خطے میں ایک ابھرتی ہوئی شپنگ منزل کے طور پر نمایاں کر دیا ہے۔

وزیرِ بحری امور جنید انوار چوہدری نے مزید کہا کہ میری ٹائم سیکٹر مستقبل میں پاکستان کی معیشت کی مضبوط بنیاد ثابت ہوگا۔