وزیراعلیٰ خیبر پختونخوا کے حلف کا معاملہ، گورنر کی دستیابی معلوم کرنے کا حکم

پشاور (ویب ڈیسک) پشاور ہائیکورٹ نے نومنتخب وزیراعلیٰ خیبر پختونخوا سہیل آفریدی سے حلف لینے کے معاملے پر گورنر خیبر پختونخوا کی دستیابی معلوم کرنے کا حکم دے دیا۔

چیف جسٹس ایس ایم عتیق شاہ کی سربراہی میں کیس کی سماعت ہوئی۔ عدالت نے تحریری حکم نامہ جاری کرتے ہوئے ایڈیشنل اٹارنی جنرل کو ہدایت کی کہ وہ گورنر کی دستیابی کے بارے میں معلومات حاصل کر کے آج دوپہر ایک بجے سے قبل عدالت کو آگاہ کریں۔

درخواست اسپیکر صوبائی اسمبلی اور دیگر ارکان نے آئین کے آرٹیکل 255 کے تحت دائر کی تھی، جس میں استدعا کی گئی کہ اگر گورنر دستیاب نہیں تو اسپیکر یا کسی اور شخصیت کو وزیراعلیٰ سے حلف لینے کے لیے نامزد کیا جائے۔

درخواست گزار کے مطابق علی امین گنڈاپور نے وزارتِ اعلیٰ سے استعفیٰ گورنر کو بھجوایا، جبکہ سہیل آفریدی 13 اکتوبر کو وزیراعلیٰ منتخب ہوئے۔ اپوزیشن کی جانب سے اعتراضات دائر کیے گئے جنہیں اسپیکر نے مسترد کرتے ہوئے رولنگ دی۔

تحریری حکم نامے کے مطابق گورنر خیبر پختونخوا نے حلف کے لیے اپنی عدم دستیابی ظاہر کی ہے، تاہم ایڈیشنل اٹارنی جنرل نے مؤقف اختیار کیا کہ گورنر پاکستان میں موجود ہیں اور وہ 15 اکتوبر کو دستیاب ہوں گے۔ عدالت نے قرار دیا کہ حلف میں مزید تاخیر صوبائی حکمرانی کے عمل میں رکاوٹ بن سکتی ہے۔