فرانس نے بھی فلسطین کو آزاد ریاست تسلیم کرلیا

فرانس نے بھی فلسطین کو آزاد ریاست تسلیم کرلیا

برطانیہ، کینیڈا، پرتگال اور آسٹریلیا کے بعد فرانس نے بھی فلسطین کو بطور آزاد ریاست تسلیم کرنے کا اعلان کردیا۔ اقوام متحدہ کی کانفرنس سے خطاب میں فرانسیسی صدر ایمانوئل میکرون نے کہا کہ مشرقِ وسطیٰ میں پائیدار امن کا قیام عالمی برادری کی اجتماعی ذمہ داری ہے۔
انہوں نے کہا کہ فلسطینی ریاست کے قیام کا وعدہ دہائیوں سے ادھورا ہے، اب وقت آگیا ہے کہ غزہ کی جنگ کو روکا جائے اور خطے کے عوام کو امن و انصاف فراہم کیا جائے۔ میکرون نے واضح کیا کہ طاقت کے بجائے قانون کی حکمرانی ہونی چاہیے۔
اپنے خطاب میں انہوں نے ان ممالک کا بھی ذکر کیا جنہوں نے فلسطینی ریاست کو تسلیم کیا ہے، جن میں اندورا، بیلجیم، لکسمبرگ، مالٹا، مراکش، سان مارینو، برطانیہ، کینیڈا اور آسٹریلیا شامل ہیں۔
فرانسیسی صدر نے غزہ میں جاری جنگ کو ناقابلِ جواز قرار دیتے ہوئے حماس سے مطالبہ کیا کہ وہ زیرِ حراست باقی 48 مغویوں کو فوری رہا کرے۔
دوسری جانب حماس نے امریکی صدر ڈونلڈ ٹرمپ کے نام ایک خط میں 60 روزہ جنگ بندی کے بدلے اسرائیل کے نصف یرغمالیوں کو رہا کرنے کی پیشکش کی ہے، جسے خطے میں امن کی جانب ایک اہم پیش رفت قرار دیا جا رہا ہے۔