چین کے لابرڈور کتے نے سڑک پر اسکوٹر چلایا، ویڈیو وائرل
چین کے شہر میئشن، صوبہ سیچوان میں ایک دلچسپ واقعہ سامنے آیا، جہاں ایک تربیت یافتہ کتا موٹرائزڈ اسکوٹر چلاتا ہوا سڑک پر نظر آیا۔
ویڈیو میں دکھایا گیا کہ ایک سیاہ رنگ کا لابرڈور نسل کا کتا وانزی اپنے مالک کے اسکوٹر پر بیٹھ کر خود ڈرائیونگ کر رہا ہے۔ کتا اپنے پنجوں کو اسٹیئرنگ وہیل پر رکھ کر توازن برقرار رکھتا اور سکون سے اسکوٹر کو آگے بڑھاتا ہے۔ یہ منظر سڑک پر موجود لوگوں کی توجہ کا مرکز بنا اور انہوں نے اسے موبائل پر ریکارڈ کرنا شروع کیا۔ چند گھنٹوں میں یہ ویڈیو چین کے سوشل میڈیا پلیٹ فارم ویبو پر وائرل ہو گئی۔
مالک کے مطابق یہ کتا نہ صرف اسکوٹر چلا سکتا ہے بلکہ اسکیٹ بورڈ پر کھڑا ہونا، کچرا باہر پھینکنا اور لائٹس آن یا آف کرنا بھی جانتا ہے۔ مالک نے بتایا کہ کتے کو یہ تمام کام کئی مہینوں کی تربیت کے بعد سکھائے گئے۔
ویڈیو کی وائرل ہونے کے بعد ٹریفک پولیس نے نوٹس لیا اور مالک کو وارننگ جاری کی کہ آئندہ کتے کو سڑک پر اسکوٹر چلانے کی اجازت نہ دی جائے، کیونکہ یہ عوامی سڑکوں کے قوانین کی خلاف ورزی اور خطرناک ہے۔
چینی صارفین میں اس واقعے پر بحث چھڑ گئی؛ کچھ نے کتے کو ذہین اور دلچسپ قرار دیا، جبکہ دیگر نے کہا کہ اس طرح کی حرکتیں حادثات کا سبب بن سکتی ہیں۔ ماہرین کا کہنا ہے کہ یہ واقعہ تفریح کا باعث ضرور ہے، لیکن سڑکوں کی حفاظت کے لیے کسی بھی جانور کو آزادانہ طور پر گاڑی یا سکوٹر چلانے کی اجازت نہیں دینی چاہیے۔