تاریخ معاف نہیں کریگی کہ ملک تباہ ہوجائے اور ادارے کہیں ہم نیوٹرل ہیں، عمران خان

شانگلہ: تحریک انصاف کے چیئرمین عمران خان نے کہا ہے کہ ملک تباہ ہورہا ہے جس پر خاموشی جرم ہے، تاریخ معاف نہیں کرے گی کہ ملک تباہ ہوجائے اور ادارے کہیں ہم نیوٹرل ہیں۔

عمران خان نے کہا کہ ہم کبھی بھی اسرائیل کو نہیں مان سکتے، امریکا کی غلام حکومت اسے تسلیم کرنا چاہتی ہے، شہباز شریف چیری بلاسم اپنے کپڑے بیچ ہی دیں کیونکہ ہرچیز مہنگی ہے، شریف فیملی کا سارا پیسہ باہر پڑا ہے جو امریکا کی ناراضی مول نہیں لے سکتی، پرسوں تک خیبرپختونخوا میں ہوں، ہماری تحریک اس حکومت کی رخصتی تک جاری رہے گی۔

انہوں نے کہا کہ ہم کسی سپر پاور کو نہیں مانتے، ہم اللہ کو مانتے ہیں، ہم جھکتے ہیں تو صرف اللہ کے سامنے، ہم سچ اور حق پر کھڑے ہوتے ہیں، خوف کے بت کو توڑ کر صرف اپنے نظریے پر چلیں گے۔